وزیر خارجہ بلاول بھٹو زرداری نے پیر کو ٹوکیو میں اپنے جاپانی ہم منصب یوشیماسا حیاشی سے ملاقات کی جس میں دونوں فریقین نے تجارت، سرمایہ کاری، انفارمیشن ٹیکنالوجی اور سیاحت سمیت متعدد شعبوں میں دوطرفہ تعاون کو فروغ دینے پر اتفاق کیا۔
بلاول جاپان کے چار روزہ دورے پر ہیں، جہاں وہ ہفتہ کو جاپانی حکومت کی دعوت پر پہنچے تھے۔ ایک روز قبل بلاول نے ٹوکیو میں مقیم پاکستانیوں سے ملاقات کی تھی، جہاں انہوں نے دونوں ممالک کے درمیان دو طرفہ تجارت بڑھانے کی ضرورت پر زور دیا تھا۔
جاپانی وزیر خارجہ سے ملاقات کے بعد مشترکہ پریس کانفرنس سے خطاب کرتے ہوئے بلاول بھٹو نے کہا کہ ہم نے تجارت، سرمایہ کاری، انسانی وسائل کی ترقی، انفارمیشن ٹیکنالوجی، سیاحت اور زراعت کے شعبوں میں باہمی طور پر مفید دوطرفہ تعاون کو مزید گہرا کرنے اور تبادلے پر اتفاق کیا ہے۔
بلاول نے کہا کہ دونوں ممالک نے “سولرائزیشن، ڈی سیلینیشن اور واٹر پیوریفیکیشن” کے ساتھ ساتھ پاکستان کے سیلاب سے متاثرہ علاقوں میں مکانات کی تعمیر نو کے لیے ٹارگٹڈ پروگرامز پر مل کر کام کرنے کے راستے تلاش کرنے پر اتفاق کیا ہے۔
اپنے خطاب کے آغاز میں، بلاول نے کہا کہ دونوں ممالک “دیرینہ دوست ہیں اور ایک خاص بندھن کا اشتراک کرتے ہیں، گہرے جڑوں پر مبنی روابط جو تاریخ اور وقت میں بہت دور تک جاتے ہیں”۔
وزیر خارجہ نے کہا کہ پاکستان جاپان کے ساتھ اپنے تعلقات کو بہت اہمیت دیتا ہے کیونکہ دونوں ممالک ضرورت کے وقت ایک دوسرے کے ساتھ کھڑے ہیں۔
بلاول نے گزشتہ سال اگست میں آسیان ریجنل فورم کے وزارتی اجلاس کے موقع پر حیاشی کے ساتھ اپنی ملاقات کو یاد کیا۔ انہوں نے اپنے جاپانی ہم منصب کے ساتھ آج کی بات چیت کو “بہت نتیجہ خیز” قرار دیا۔
انہوں نے کہا کہ دونوں فریقوں نے “ہنرمند افرادی قوت کی نقل و حرکت کو آسان بنانے کے لیے پاکستان میں جاپانی زبان کے لیے لینگویج سکلز اسسمنٹ ٹیسٹ منعقد کرنے” پر بھی اتفاق کیا ہے۔
وزیر خارجہ نے گزشتہ سال کے تباہ کن سیلاب اور اس کے نتیجے میں امداد اور بحالی کی کوششوں کے دوران تعاون پر جاپانی حکومت اور جاپان کے عوام کا بھی شکریہ ادا کیا۔