پاکستان ایران دوطرفہ سیاسی مشاورت کا دو روزہ 12واں دور ہفتہ سے تہران میں شروع ہوگا۔
ترجمان دفتر خارجہ ممتاز زہرہ بلوچ کے مطابق پاکستانی وفد کی قیادت سیکرٹری خارجہ اسد مجید خان کریں گے جبکہ ایرانی وفد کی قیادت نائب وزیر خارجہ برائے سیاسی امور علی باقری کنی کریں گے۔
گزشتہ اجلاس کے فیصلوں پر عملدرآمد کے حوالے سے پیش رفت کا جائزہ لیتے ہوئے دونوں فریقین پاکستان ایران دوطرفہ تعلقات کے تمام پہلوؤں کا جائزہ لیں گے جن میں سیاسی، اقتصادی، تجارتی، سرمایہ کاری، سرحدی سلامتی، تعلیم، موسمیاتی تبدیلی اور ثقافت کے شعبوں کا احاطہ کیا گیا ہے۔
وہ علاقائی صورتحال بالخصوص افغانستان، کشمیر، ایران سعودی عرب سفارتی تعلقات کی بحالی اور علاقائی امن و استحکام پر بھی بات چیت کریں گے۔
باہمی دلچسپی کے تمام شعبوں میں جاری تعاون کو فروغ دینے کے لیے ادارہ جاتی فریم ورک پر پیش رفت پر بات چیت بھی دوطرفہ سیاسی مشاورت کا حصہ ہو گی۔
تہران میں سیکرٹری خارجہ ایرانی وزیر خارجہ سے ملاقات کریں گے اور انسٹی ٹیوٹ آف پولیٹیکل اینڈ انٹرنیشنل اسٹڈیز سے خطاب کریں گے۔
وہ اکنامک کوآپریشن آرگنائزیشن (ای سی او) کے سیکرٹری جنرل اور پاکستان ایران پارلیمانی فرینڈ شپ گروپ کے چیئرمین سے بھی ملاقات کریں گے۔