وزیر اعظم شہباز شریف نے متعلقہ حکام کو سرکاری عمارتوں کو شمسی توانائی میں تبدیل کرنے کے عمل کو تیز کرنے کی ہدایت کی ہے کیونکہ ملک میں شمسی توانائی کی بے پناہ صلاحیت موجود ہے۔
ہفتہ کو لاہور میں ایک اجلاس کی صدارت کرتے ہوئے انہوں نے کہا کہ بجٹ میں قابل تجدید وسائل بالخصوص شمسی توانائی سے بجلی پیدا کرنے کے لیے ٹھوس اقدامات کیے گئے ہیں۔
شمسی توانائی کے فوائد پر روشنی ڈالتے ہوئے وزیراعظم نے کہا کہ ملک قیمتی زرمبادلہ بچا سکتا ہے کیونکہ اس سے ملک میں سستی بجلی پیدا کرنا ممکن ہو گا۔
شہباز شریف نے شمسی توانائی سے متعلق پالیسی سازی کے عمل کو تیز کرتے ہوئے حتمی فریم ورک وضع کرنے کا بھی حکم دیا۔
وزیراعظم کو قابل تجدید اور شمسی توانائی سے متعلق ملک بھر میں جاری منصوبوں سے بجلی کی پیداوار سے متعلق پالیسی کے بارے میں بریفنگ دی گئی۔
اجلاس میں وفاقی وزراء خواجہ آصف، انجینئر خرم دستگیر خان، سید نوید قمر اور ریاض حسین پیرزادہ، وزیراعظم کے مشیر احد خان چیمہ، معاون خصوصی جہانزیب خان، چیئرمین نیپرا اور دیگر حکام نے شرکت کی۔