پنجاب اسمبلی کے سابق ڈپٹی سپیکر اور پاکستان تحریک انصاف (پی ٹی آئی) کے ناراض رہنما دوست محمد مزاری نے پیر کو پارٹی کو خیرباد کہہ دیا۔
پی ٹی آئی کے منحرف رہنما نے پاکستان مسلم لیگ نواز (پی ایم ایل این) کی سینئر نائب صدر اور چیف آرگنائزر مریم نواز سے ملاقات کی۔
ملاقات میں مزاری نے قیادت پر مکمل اعتماد کا اظہار کرتے ہوئے مسلم لیگ ن میں شمولیت کا اعلان کیا۔
اس موقع پر مسلم لیگ ن کی چیف آرگنائزر مریم نواز نے سابق ڈپٹی سپیکر پنجاب اسمبلی کو پارٹی میں خوش آمدید کہتے ہوئے کہا کہ ان کی شمولیت سے مسلم لیگ ن جنوبی پنجاب میں مزید مضبوط ہو گی۔
واضح رہے کہ پی ٹی آئی اس وقت بدنظمی کا شکار ہے، اور اس کے کئی رہنما پارٹی چھوڑ چکے ہیں، جن میں عامر کیانی، ملک امین اسلم، مولوی محمود، ڈاکٹر افضل ڈھانڈلہ، پی ٹی آئی کراچی کے صدر آفتاب صدیقی اور دیگر شامل ہیں۔